سردیوں میں ورزش کرنے کے زیادہ فائدے

ہمارے جسم کو صحت مند رہنے کے لئے ہر موسم میں ورزش کی ضرورت ہے تاہم موسم سرما میں ہم سست ہو جاتے ہیں اور باہر جانے سے احتراز کرتے ہیں۔سردیوں میں ویسے بھی خوراک بڑھ جاتی ہے لہٰذا حرکت نہ ہونے اور صرف کھاتے رہنے سے ہم فربہ ہو جاتے ہیں۔

سابق مسٹر پاکستان فدا حسین بلوچ موسم سرما کے دوران کی جانے والی ورزشوں کے بارے میں بتاتے ہوئے کہتے ہیں کہ وزن کم کرنے کے خواہش مند افراد کے لئے سردیوں کا موسم بہترین ہے کیونکہ سردیوں میں ہماری دھڑکن کی رفتار کم ہوتی ہے لہٰذا ہم ورک آؤٹ میں زیادہ طاقت صرف کرتے ہیں یوں ہم زیادہ کیلوریز جلاتے ہیں۔

علاوہ ازیں سردیوں میں پسینہ بھی دیر سے آتا ہے لہٰذا ہم زیادہ ورزش کر سکتے ہیں،بہ نسبت گرمیوں کے جب تھوڑی سی ورزش میں ہی ہمارے پسینے بہہ جاتے ہیں۔فدا حسین نے کہا کہ باقاعدہ ورک آؤٹ سے قبل وارم اپ یا جسم کو گرم کرنا بہت ضروری ہے ورنہ سخت ورزش سے نقصان پہنچ سکتا ہے۔انہوں نے کہا کہ نیا نیا ورک آؤٹ شروع کرنے والے افراد چہل قدمی سے وارم اپ کریں اور زیادہ بھاری ورزشیں کرنے سے گریز کریں۔